SLP: Moe Moe, Laimp4 nih bia hal kan in duh caah caan na kan pe kho hnga maw?

MM: Keimah hna bia hal nan ka duh ahcun a ngah tuk ko. Internet belte hi duhning in ka hman khawh lo caah caan lak deuh a hau men lai.

SLP: Na konglam tawite na kan chim kho hnga maw?

MM: Ka nu le ka pa min cu Pu Thawng Ling le Pi Sung Len an si. Thau khuami kan si. Unau paruk lakah pa li nak ka si. Hakha khua ah (5.6.1987) ah ka chuak. Kawlram hmun kip ah kan i tthial caah atu tiang zong ka chuahkehnak Laitlang zong ka phan kho rih lo ee.

SLP: Lairam phak bal loin, "Lairam Par Dawh" hla na sakmi kha na thiam tuk. Lairam phan kho chinchin law atu nak hin na fiil deuh hnga i a ttha chinchin hnga. A si ah, na min hi Moe Moe kan in ti ve ko le na min pum le a sullam theih kan duh ko.

MM: Lairam cu ka phan bal lo nain hmanthlak le video in ka hmuh caah Lairam dawhnak cu ka fiil kho ve ko e. Ka min cu Khin Moe Wai a si. A sullam cu "Daihnak Ruah" tinak a si ko. Kawl ah kan um caah Kawl auh fawi nak in sakmi si ko. Ka Lai min cu Van Dawt Cin a si.

SLP: "Daihnak Ruah" ti cu "Thluachuah Ruah" ti he aa khat ko cu. Na Kawl min he na Lai min he a sullam an ttha tuk. Cawnnak lei ah tah zeidah na lawh, cawn lio mi hna na ngei maw?

MM: Kawlram Mihttilar ah tang 3 tiang, Pyinmana ah tang 10 tiang ka cawng. Atu cu Phychology in degree ka lak cang.

SLP: Phychology lei na cawn cu kan in lomhpi tuk ve. Hawi he i komhnak ah hin minung Phycho theih lo ahcun buainak a tam, theih ahcun zei poah a tluang fawn. Na hawikawm le na pasal ding cu ai vantthat ko lai hi ta. Hlasak lei ah nai pekning theih kan duh ko.

MM: Malaysia ah kan sak mi, "Zai Hla He Kan In Tlawng Hna" timi VCD le Melody World zuamnak kai tel mi hna hi biatak deuh in hla ka sak cu an si. Cu hnu lawng ah Laimi nih an ka theih.

SLP: Melody World zuamnak kong cu fiang deuh in?

MM: Zomia Media nih Melody World hlasak zuamnak hi an tuahmi a si. 2009 kum ah kai zuam ve. Minung 600 hrawng kan i zuam hna. Group in an kan tthen hnu ah Myawady TV in thla ruk chung an kan zuam ter. Group pakhat in a thiam bik kha an thim hna i level 1, 2, 3, 4, 5, in final tiang kan i zuam.

SLP: Nan i zuamnak kong cu tlamtling deuh in?

MM: Level 1, 2, 3, 4, 5, tiang cu kanmah group ah a thiam bik ah an ka thim. Final ah cun pa pahnih le nu pahnih lawng kan tang. Pa pahnih an tlak hnu ah nu pahnih kan tang. "The Best Of Melody World" cu Kawlnu tu an pek, kei cu pahnihnak ka si.

SLP: Thawng kan theihnak ah, "Moe Moe nih a tei tuk ko na in mark petu hna hi Kawl an si caah Kawl nu hi pakhatnak an pek", ti'n an chim. Cu kong ah cun zeidah chim na duh?

MM: Pahnihnak hmuh ding cu kai ruah lo caah result an chim ah hin ka lau ngai ko. Kan mark zong a tluk ko na te in Kawlnu Shwe Phu Maung kha "The Best Of Melody World" an pek. Pahnihnak ka hmuh tikah hin a ka dawtu le a ka tanhtu hna thinlung chungah hmunhma ka ngei chinchin tiah ka ruah. Cucaah ka min a than deuh nak tu hmanh a si, Pathian remruat a si ko, ka ti le kai lungsak ko.

SLP: Lawmman ah zei dah an in pek?

MM: Lawmman ah Ks. 700,000 laksawng an ka pek. Lawmman ka hmuhmi nak hin Laimi aiawh in Kawlram pumpi hlasak zuamnak ah ka vai tel khawhmi kha kai lawmh deuh mi a si.

SLP: Si bak, Laimi ai na awhmi le Laithuam hen Kawl mipi hmai ah nai telmi kha kan in lawmhpi tuk ve. Hla hi teh na phuah bal maw?

MM: Hla hi fung tampi ka phuah ve cang. Ka hla ttialmi fungkhat cu a tu Melody World 2009 hlaphel ah ka sak. A dang pawl cu keimah lawng in ka chuah khawh tik caah kai chiah. Keimah lawng in chuah khawhnak ding caah thla ka cam lio a si. Theinkyian hla pakhat ka phuahmi zong a um.

SLP: A phuah he a sak he na kemh khawh cu kan i lawm tuk. VCD phel ah voi zeizat dah nai tel cang?

MM: Lai hla in cun 2008 lio ah "Zai Hla He Kan In Tlawng Hna" ti mi hlaphel ah kai tel.. Volume -1 le 2 ti in a um. Volume -1 lawng a chuak rih. Volume -2 cu a hnu ah a chuak te lai. Kawl hla in cun atu hlasak kan i zuamnak in chuahmi le KKT nih a chuah mi VCD ah ka tel. Hi hnu zong ah chuah ding a um rih. A tu hi studio ah kai khumh lio a si.

SLP: KKT na ti mi hi fiang deuh in?

MM: KKT cu minung min a si. Producer zong asi hlei ah amah zong hla a sa ve. Amah tuahmi Album ah hla sak a ka sawm ve mi khi a si. Amah he cun hla tampi kan I khumh rih lai.

SLP: Malaysia hla na sak lio, "Zaihla in kan in tlawng hna" timi chung i zuri pa nih pangpar an pek thulh ai kirpi thulh mi kha DC tlangval nih an hmuh le zuri pa kha vuak pei an duh cu. Nangmah an in tihram mi kha a celh in an celh lo.

MM: Keimah zawn an ka ruah cu kai lawm tuk tiah rak ka chimhpiak te hna. Vuak tiangtiang cu a ttha lai lo. Mah bantuk kha cu hlasa mi tampi nih an ton cio mi a si ko. Bia dawhlo ngai in au hnawhmi hna zong an um tawn si. Kei nih cun ka ruah thiam tuk ko.

SLP: Hlasak thiam hlei ah lungsau zong na kemh chih cu lomh a um tuk fawn. Pianthar hnu love song sak hi a cheu nih an duh lo, a cheu nih a poi lo, an ti ve. Nang zeitindah na ruahning a si?

MM: Love song sak ti mi cu nungak tlangval duhnak bia chim he a khat ko ti ah ka ruah ko. Sak le chim te kha ai dang le a si. Piangthar cia mi zong minung kan si caah duhmi an ngei cio lai i duhnak bia chim cu an hrial kho cio lai lo dah ka ti. A si na in Love song sak ah cun vawlei lei ah lungthin cu a kal ter deuh ko. A si khawh ah cun Love song sak tam cu thlarau lei
ah cun kan nun a hul deuh ko caah Love Song sak nak in Pathian hla sak tam cu a tha deuh ko.

SLP: Na bialehnak cu ka lung na ka ton tuk ai. Piangthar zong cu an i sah ve ko le duhnak bia cu an chim khe ko. A chim in chim vial a poi lo ti ttung I a sak in sak vial sual ngai in hmuh cu ruah awk ngai asi tak ko. Na filosawfi a sang bak ko hi. Lai nungak parcel in an cah tawn hna hi teh a tha na ti ve maw?

MM: Zei kong paoh ah a chia le a ttha cu a um mi si ko le a chia ee a tha ee ti cu ka chim thiam ve lo. Ai thatpimi an um ve lai, ai chiatpi mi zong an um ve ko lai.

SLP: Na bialehnak cu uar a um tuk. Ai cahmi lak ah hin ai dawmi tampi lakah buainak a tongmi an um len tak pei tiah. Nang hi muidawh, pumrua tthat le hlasak thiam na kemh caah duhtu tampi na ngei lai ti cu a fiang ko. Nannmah lei nih aphi na pekmi tlangval hna an um cang maw?

MM: A tu tiang ah cun Kawlram ah ka um peng i ka pawng ah Lai pa an um lo caah duh ding ka hmu rih lo. Aphi pek mi ka ngeih tikah kan chimh te hna lai mu.

SLP: A si ah, na pasal ca ding ah na duh phun zeidah a si?

MM: Minung cu kan thinlung in kan duhmi le kan thluak in duhmi hi ai khat tawn lo. Ka lungthin in ka duhmi pa hi ka thluak in ka duh lo kho men. Ka thluak in ka duhmi pa zong hi ka thinlung in ka duh ve lo kho men. Mah ruang ah cun chim awk ka thei rih lo.

SLP: Na duhphun a tlinhmi an um ko lai caah, na e-mail na chim kho hna lai maw?

MM: Chim kho ko e, moemoem7@gmail.com, Tel. 593106.

SLP: Zei dah si na duh bik?

MM: Sung Tin Par bantuk in hla lei ah Laimi min langhtertu si hi ka duh.

SLP: Lai mino hna sin ah bia cah na duh mi?

MM: Kan phaknak kip ah Pathian theih le nun thianhlim, cawnmi le tuahmi ah thiam taktak, mi nih zoh chunh awk tlak mi si i zuam cio hna u sih.

SLP: Kan biaruah a thaw tuk le hawi dang nak tam deuh kan in hal hi mu. A donghnak bik ah Kawlram thimnak ah thimfung hna na va thla ve maw? Zaukphung (Democracy) cu kan hmu te lai tiah na zum maw?

MM: Thimfung cu ka thlak ve ko. Political lei cu ka tuimi a si lo caah a ruah awk ka thei lo. Ni khatkhat cu Democracy kan ngah te ko lai tiah ruahchannak ka ngei ko.