SLP: Pa Herh, Laimp4 nih biaruah kan in duh i caan na pe kho hnga maw?

HL: Ka pek khawh ko lai.

SLP: Na tuanbia tawi na kan chim kho lai maw?

HL: Ka nu le ka pa min cu Pu Hei Mang (tleicia) le Pi Iang Chin an si. Hakha khua ah ka chuak. Ka cawnmi cu B.A Hist., B.Th.( IMCP ), le a tu 2009 ah hin M.Div II year ( MIT ) ka kai lio.

SLP: Hla lei ah duhnak na ngeihning?

HL: Hla hi ka ngakchiat lio te in ka rak duh cang nain, 2000 KUM hnu lawng ah hin biatak deuh in kaa lenh hi a si.

SLP: CD, VCD le DVD ah voi zeizatdah na hlasakmi ai tel cang?

HL: VCD, DVD le CD ah voi ruk kaa tel cang.

SLP: Hla hi fung zeizat tluk dah na phuah cang? Phuah chap nai tiim ti maw?

HL: Pathianhla le zuunhla fonh in fung 300 hrawng ka phuah cang. Ka dam le can ttha a um ahcun phuah rih ka duh ko.

SLP: Na hla lak ah duh bik mi, phuah fuhmi, tbt na ngei maw?

HL: Ka duhbikmi ti cun a um lem lo. Ka si khawh tawk in kaa zuam mi an si dih ko.

SLP: Hniang Hniang he "Ngun Doi tta" ti hla nan sakmi kha mi nih an uar bik ko rua. Na tonmi chung in hla bia a hong chuakmi a si maw?

HL: Keimah nih ka tonmi cu a si lo nain, Laimi kan nunphung ah aa leng aa kaimi kan si zia, kan nunphung kha hla ah ka cuanter bia a si. Nangmah tonmi hna a si ve dek maw?

SLP: Cu bantuk ngaknu nu le pa nih khenkhammi si cu ka tong bal ve lo. Midang deuh an si ko lai. Concert tbt ah hla na sa tam maw?

HL: Voikhat-te khi LBC center ah "Ka thinlung ngeitu " timi hla ka rak sa bal ve.

SLP: Muzik le solfa lei hi na cawng bal maw? Zei tluk thiam dah na si?

HL: Ka cawngbal ko. Keimah hlaphannak fangfang cu ka thiam ko.

SLP: Hla na phuah man ah hin zei laksawng tal an in pe tawn maw?

HL: Laksawng an ka pek lengmang ko.

SLP: Zu hi din thiam ahcun a poi lo a timi an um, nang tah na ti ve maw?

HL: Ngandamnak, khuasaknak, thinlung nuncan fimkaannak zeimawzat hi zu nih a hrawh khawh ko ca-ah dinlo ah a ttha bik ko ka ti.

SLP: Laimi hlasakthiam lak ah a ho dah na duh bik, zei ruang ah?

HL: Laihla sakthiam lak ah hin Ngun Thawng Chin aw hi a tluang bik ka ti.

SLP: Lai hla tthanchonak ca-ah zeidah a herh?

HL: Hlasatu le hlaphuahtu kan dihlak in kan i biatak deuh a herh ko. Cun, mipi lei zong nih biatak tein dirkamh a herh ve. Phuah man le sak man le chuah man zong hmuh pah ahcun a tthangcho ko lai. Atu zongah hin ramdang lei nih thazang nan kan pek caah a tthangcho ngaingai ko cang.

SLP: Hrintthan hnu zuun hla sak kongah na hmuhning?

HL: Zumhnak lei ah cun pomning aa dang cio ko lai, kei cu Pathianhla le zuunhla hi aa kalh in ka hmu lo. A satu thinlung nawl cio a si lai cu.

SLP: Laimi ramdang kal hi a ttha na ti maw, ttha lo na ti dah, zei ruang ah?

HL: Laimi ramdang kal hi um hlah seh law chim a um hnga lo. Ramleng ummi kan unau hna hi a kan cawmtu, a kan zohkhenhtu, a kan cawisangtu nan si ko. Hun kan bawm peng ko u, nan cungah kan i lawm tuk.

SLP: Laimi ramdang kal hi Pathian thluachuah na ti ve maw?

HL: Pathian thluachuah kan ti lio ah Pathian duhnak zulh hi kan philh sual lai ti hi ka sia a herh.

SLP: Laimp4 tuahmi kongah na hmuhning le ruahnak cheuh na duhmi?

HL: Laimp4 nih hin laibia, laihla, laica, laiholh le lainunphung zeimawzat cu nan kilven ko lai ti ka zumh. Hmailei zong ah dongcatlo in kan zuam piak ko rih u. Miphun dawtnak lungput in nantuahmi hna hi Pathian nih thlua in chuah ko hna seh ti hi ka thlacamnak a si ko.

SLP: Lai mino hna sinah biacah na duh mi?

HL: A tu ah hin cun, Laimino hna hi tthannak, tlonlennak , hmuhtonmi, tonghthammi le cawnlaakmi tbk.. aa khat cio hna lo. Khuazei ram kan um hmanh ah kan dirhmun cio in thilttha tuah le tthancho i zuam cio hna u sih, cucu Pathian
duhnak a si i miphun dawt zong a si ko. Kaa lawm.