SLP: Na tuanbia tawi na kan chim kho hnga maw?

C.VT: Ka khua cu Vanzang a si. Acozah sianginn kan rak ngeih rih lo caah tangli in tang sarih tiang Farrawn ah ka cawng. Tangriat le tangkua Hakha ah ka cawng i, tang hra in B. A. tiang Rengkun ah ka kai. 1973 ah B. A. History in ka awng. 1977 ah nupi ka thi. Kan nu min cu Angela Than Than a si. Kan pahnih in atu Manila ah Bible kan cawngti. Kei nih D. Min. le Ph. D. pakhat veve ka hlawhtlinh lioah kan nu cu fa hmanh ka ngeih lo tiah teiman thlu chuachuah kaw, Pathian bawmhnak thawngin D. Min. pahnih le Ph. D. pakhat a hlawhtlinh cang i, atu Ph. D. a pahnihnak, PCU ah a cawng lio.

SLP: Fim cawnnak lei ah Bawipa nih thlua an chuahmi hna cungah kan lomhpi tuk ve hna. Na riantuan balmi tah zei hna dah an si?

C.VT: Ka u tleicia pu Leng Dun nih acozah riantuan a rak ka senh lo i, chaw ka rak dawr. Cu pah cun Aizawl le Calcutta a rak ka tlawnpi tawn. Cu hnu ah YMCA Secretary kum riat ka tuan. Atu Hakha YMCA innpi khi keimah le pu Siang Uk le tleicia pu Tun Thawng kan tuanti lio i sakmi a si. Kai phuah in atu pu Thla Kio Lian nih khin Secy. a vun tuan ve. Caan tlawmpal hnuah CJC Krihfabu ah E & M Director ka tuan. Cu hnuah Chin State Cooperative Syndicate office ah Secretary kum li renglo ka tuan. Cun Rengkun ah Pathian rian full-time tuan dingin 1992 ah kan ithial. Gospel For Asia ah Secretary ka tuan pah in GFA Bible College ah kum hra renglo Miran g ca ka chim. Cun CJC Literature Chairman ka tuan pahin Kawlca magazine editor kum tam nawn ka tuan.

SLP: Literature na hun ti chom in, cauk tam nawn a let cang an ti bang?

C.VT: Si, caleh rian hi Pathian nih gift ah a ka pekmi a si ve rua tiah ka ruah. 2004 kum Manila sianginn ka kai tiangah khan uk 40 renglo deuh ka let cang. Ka chan chungah a tlawm bik uk zakhat tal letning ti saduh ka that.

SLP: Krihfa lei cauk maw na leh tam deuh vawlei lei cauk dah?

C.VT: Atu tiangah cun Krihfa lei lawngte an si rih. Hakha kan um lio zongah pu Van Hnuai Sum hruainak in Free Evangelical Fellowship of Burma (FEFB) hi 1981 in ’84 tiang kan rak dirh i kum thum chung FEFB mekazin editor ka rak tuan. Cu Fellowship cu a hung thi nain FEFB mekazine thihter cu ka siang lo i, a hnu kum ruk tiang keimah private in ka rak chuah. A reltu hna love gift pekmi nih a zin a rak tum. Rengkun kai thial ruangah ka pehzulh kho ti lo i a poi ka ti ngai.

SLP: Na calehmi cu Kawlholh in maw a si, Laiholh in dah?

C.VT: Hakha holh cun uk nga ruk tluk a si; a dang cu Kawlholh lawngte an si ko.

SLP: Uk 40 renglo na leh cang ahcun Laimi chungah a let tam cem na si ko hnga lo maw? Midang a let tammi hodah a um ve?

C.VT: A let tam cem ka si men ko lai dah ka ti ve. Falam pa Capt. Pension pu Thang Lung zong hi a let tam ngai ve.

SLP: Na lehning ah nai lungsi bikmi cauk zeidah a si?

C.VT: Umm…Hakha holh cun Wurmbrand nupi Sabina tialmi "Pastor Nupi" le Zac Poonen tialmi "Beauty for Ashes" hna khi kai lungsi cem. Kawlholh cun E. M. Bound cauk "Power Through Prayer" le R. K. Campbell cauk "The Church of the Living God" khi kai lungsi deuh cem hna.

SLP: Ca leh man ah zei lawmman tal an in pe maw?

C.VT: Cahmai pakhat ah US $ 1 (fang khat) an ka pek.

SLP: Hakha Centenial Jubilee ah khan cauk lei lawmman hmu mi ah na min ai tel bang..?

C.VT: Si, Pathian thawngin ca leh ruang upat peknak suica pakhat ka dong ve.

SLP: Atu teh fialtu ngei law na let kho rih hnga maw? Zeibantuk cauk dah letning ti na duh?

C.VT: Kawl nih "Watana cu thlauh a har" an ti bang caleh cu ka hiar ngai rih ko. Mah duh ahcun Bible Commentary uk khat tal Kawlholh he Laiholh he let kho ning law Laimi Krihfa kan caah santlai a si bik hnga, ti ka ruat.

SLP: Bia dang deuh ah sau deuh kan kal nain Ca lei na riantuanak tampi kan theih i kan i lawm. Muzik lei ah na luhning hi teh zeitindah asi?

C.VT: Music band hi Rengkun University ka kai lioin Kawl pawl he 1972 khan ka rak dirh cang. Radio hla ka sakmi paohpoah khi kanmah band nih cun kan rak tum colh. Ka ule tangka kuat hnihkhat mi hi thilpuan le cauk ah hmang loin music thilri tu ka rak cawknak tawn. 1973 ah ka music thilri he cun Hakha ka hung phan i, ka u Dun nih capo ah a rak saih tawnmi cu, "Ka naupa B. A. degree he a hung tlung le fawh cauk pakhat hmanh phur loin music instrument tu khat thupin a kan phurh cu hih…," ti a si. Ka u nih cun music cu uar ngai ve kaw India a tlawn pah hin a herhmi tete a vun ka cawkpiak chap lengmang tawn. Drumset zong a timcheu India in a hun kan phurh i bass drum tu, a ngan caah, Kawlram ah kan zalh.

SLP: Nangmah hlan ah Hakha khua ah Muzik Band a rak um cang maw?

C.VT: Hakha ka tlun ah hin pu Chawn Kio, pu Za Hit le pu Thawng Su te pawl hruainak in "Seino Music Group" an rak dirh cang; 1972 hrawng a si ve ko rua. Pu Ram Lian tuahmi electric guitars hmangin atu Rev. Biak Hnun, pu Thang Hmun, pu Van Hu, pu Ni Kham te pawl nih an rak tumpiak hna. (Hi zawnah hin group hnih ka cawh sual hna dek maw, a hlan ngai cang i ka palh khawh men). Drums belte an rak ngei lo.

Cun Hakha khua le musik kongah hin pu Ngun Thawng te unau rual min philhthlau awk an tha lo. Daniel, Ngun Thawng, Peter le an nute fapa Richard hi Rengkun ah sianginn an rak kai. An hung tlun caan poah ah zanchiar hollow tingtang cu an ithuan i hla an sa. Innpa kan si caah cu nih cun muzik a rak ka duhter ngaingai. Pu Ngun Thawng hruainak in kharpi paohah University fundfair kan rak tuah tawn.

SLP: Ngun Thawng na timi hi John Rush Thawng min in radio ah hla a satu kha asi maw?

C.VT: A si ko, an unaurual te hin hla le muzik lei ah an tui i a thiam zong an thiam. An farnu hniang, Rose Mary zong kha hlasak a thiam ngai pei tiah. Pu Ni Kham te band ah pi Bawi Cin he an hlasak minthang pei an rak si cu.Manila radio zongah Pathian hla a sa an ti. An pa he zong Pathian hla cassette album pakhat an ngei. Zapi ca belte ah an release rua lo dah ka ti.

SLP: Nangmah nih Muzik Band na van thokning tah?

C.VT: Drumset he tlamtling tein music band kan Lairam ah a derh hmasa biktu cu keimah ka si. Organ belte kan rak hmang kho lo; a chan a rak si rih fawn lo. Kawlram music band vialte zongah The Aces lawng nih organ/piano an rak hman.

Kan Band min hi "Blue Stars" kan rak ti nain tleicia u Bik, (Rev. Dr. Van Bik) nih khan, "Vante, nan band min hi Kawl nih apia mintha an timi khi a lo le nan thlen ah a tha lo maw?" a rak ti. Pu Hrang Nawl ruahnak kan rak hal i, "The Cream" ti a kan duhpiak; kannih nih "Blue Smiles" ti kan duh; voih fung kan rak zuk le "Blue Smiles" nih a rak tei.

SLP: Kan pa le hna sinah ruahnak na rak hal hna cu i cawn cio awk ngai asi. Blue Smiles ah cun a tumtu hna ho te dah nan rak si?

C.VT: A tumtu ka naule hi an i thleng lengmang. Kum 30 cu rau cang kaw, a philh zong ka philh pah ve cang. Lead guitar tu cu keimah nih ka tlaih peng. Bass ah hin tleicia Lian Hlir, Tial Peng, Thang Uk le Tial Awi a kum zulhin an i thleng. Rhythm hi tleicia u Tin Uk , Thang Bik, le Dr. Lal Eng Zau hna nih an rak ka bomh ve tawn. Drums ah tleicia Thla Hram, Ram Cung, Tin Nyo le Biak Hu, kum khat hnu kum khat, an i thleng. Thlennawn a tam hi rian ruah i Hakha an chuahtak ruangah a si.

SLP: Concert hna nan rak tuah tawn maw? Hlasatu tah ho te dah an rak si?

C.VT: Hakha le Falam ah stageshow kan rak tuah tawn ko. Hlasak thiam minthang Kio Hmung, Tin Tlung, Fam Men, Bawihte, Renh Tlem (Mizoram) hna nih hla an rak kan sakpiak. Khawmpi le thit-umh ah an rak kan laak lengmang tawn. Sihhmuh Van Lo jubilee le Hriphi Heng Cin jubilee ko ah mipi an rak ilawm khun rua ka ti. Laitlang bawlung puai le Rengkun leiin a tlung tharmi bawi donnak paoh ah kanmah nih kan rak tumpiak tawn hna. Cu lio Hakha khuachung hlasak thiam minthang kan rak ngeihchunmi hna cu Tin Tin Htun, Hlawn Tang, Thla Meng, Aye Aye Myint le Far Meng hna an rak si.

SLP: "Mintha Zaw One"a min a than liote ah Hakha Falam hrawngah nan rak tumpiak bal ti kan theih. Nanmah cahmi maw a rak si?

C.VT: Mintha Zaw One kha kanmah cahmi asi lo. Kawl cozah nih 1974 Referendum an tuah lai ah khan mipi awitu dingah an hun fialmi hna an si. Zaw Min Lay zong Kala hla a lehmi in a min a than liote kha si ve kaw, cu hna pahnih le hlasak thiam dang ah Kio Hmung, Tin Tlung le Fam Men te hna hen Hakha le Falam kan rak tum. Cu hnu ah, Tidim le Kalay Tamu tiang Party Unit request in, kan rak zul, kan rak tumpiak hna. Hla tialthiam tleicia Ko Lay Lwin nih a hun hruai hna. "Nan kan bawmh caah na duh ahcun hla tial a lakin kan bawmh ve lai," a rak ka ti. Mintha Zaw One zong nih cun, "A lakin hla kan sakpiak ve lai,’ a rak ka ti ve.

SLP: Kawl hla phel na rak chuah bal rua ti?

C.VT: A tu ka hun chim cuahmah bang, Ko Lay Lwin le Zaw One bawmhnak in Kawl hla phel 1978 ah ka rak chuah ve. Zaw One nih fung 4, kei nih Nwe Yin Win le Lay Lay New he fung khat veve; anmah lawng fung 2 cio le keimah lawng fung khat " Chin Galay Pha Way " timi min in ka rak chuah. Tha Pyay Tay magazine vol. 8 ah ka hla le ka hmanthlak zong a rak chuak phah ve. Cucu tlangcung kan Laimi lakah Kawlholh in a chuak hmasa bik cassette a rak si. Tleicia salai Sun Ceu kha 1980s ah a si i, a 2-nak a si lai cu.

SLP: "Chin Galay Pha Way" cu a rak poh ve maw?

C.VT: Kan nih lio cu series chan si hlah kaw ka rak poh kho lo. Hla tha poah thim i, a chia poah nganh chan a rak si le nganh in ka rak um ko khah. He..he..he..

SLP: Lalsangzuali Sailo tape phel a rak chuahpiak an ti bang?

C.VT: A hmaan. Tape phel kongah hin keimah hla nak hmanh in legendary ah ka ruah deuhmi cu ka hawi tha tleicia Pi Lalsangzuali Sailo tape phel ka rak chuahpiakmi kha a si. "Thlafam Kir Dar Ri Se," title in 1978 ah ka rak chuah i Mizoram ah a um hmasa bikmi cassette album a rak si. Aizawl ah a aw ka hung laak i Rengkun ah The Aces ka rak tumter hna. "Cu nu aw that tak cu aw, khoikaahdah a um, ziah a mipum na ratpi lo?" an rak ti. "Hakha ah a um; a ke a tha lo," tiah ka rak hlen hna. Cu hnu ah keimah home recording studio in Pathian hla Tin Tlung le a hawile album khat ka rak chuah fawn.

SLP: Radio na hlasakmi ngaknu nih an request len tawn kha kan theih bal. Fung zeizatdah Radio ah nai khumh?

C.VT: Radio ah hin love song fung 75 bak ka sa i, Pi Kyawk Htwe zong nih Lai Radio ah hla tam bik a sa hmasatu na si, a rak ka ti. Ka hung pianthar in ka hlohpiak u, ka ti hna nain, "Na ta a si ti lo. Kan in cawk cang; Cozah ta a si," an rak ka ti. Ka hla lakah request a tong cemmi cu "Thennak Vawlei" ti a si le fawh philhlonak ah atu Lai muvi kan vun chuahmi zong "Thennak Vawlei" ti min ka sak thannak hi a si.

SLP: Tin Tin Htun le Sui Thluai Thang kha nan rak tumpiak bal hna maw?

C.VT: An pahnih in a tam deuh cu kanmah band nih kan tumpiak tawn hna. An hla sakmi zong khi keimah phuahpiakmi a um len. "Ka Cung Bongva Te Aw" timi Sui Thluai Thang sakmi zong khi "Mr. Love" timi hla aw in ka rak phuahpiakmi a si. Hi hna pahnih hla hi zarhchiar requesttu an rak tampi tawn. Tin Tin Htun he kan rak sakmi, "Ihzan Mangah I Tong Sih," timi zong khi request a rak tong ngai ve.

SLP: Hrinthan hnu ah na love song sak cia hmanh hlohpiak na duh cu, hrinthan hnu love song sak kong ah na ruahning?

C.VT: Hrinthan hnu love song sak cu Mizo le Laimi kan embedded Christian philosophy-ning ahcun a si kho deuh lo. 2003 Chapchar Kut hrawngah a min a rak thang tukmi Mizo seino Vanlal Sailova zong a piangthar le love song sak a ngol cang ti kan theih. Mirang tlangval, Cliff Richard belte Billy Graham crusade in a hrinthar ka ah, "Rock music na sa ti lai maw?" tiah an rak hal i, "Ka sa rih ko lai", a rak ti. A sak ve peng ko caah, thlarau leiah hruaitu cu a si kho ve taktak lo. Vawlei lei belte in "Sir" timi upatnak an pek.

SLP: Na hrinthanning tawi tein na kan chim kho hnga maw?

C.VT: A tawi kho lo men lai e. Music leader ti cu ka rak khawvel ngaite. Pa hawi, nu hawi tampi ka ngei le kan nu hi a awlok a rak chong. Cu lioah, a pa nih a hun thihtaknak thawngin Pathian auhnak a dong hmasa. A hung thar cun kum thum chung kan ido. Hehlawtiah rawl-ul kaw a ka tei. Ka hawi tha le kan innpa, pu No Kio a rak thih lai zan ah khan an innhmai zan 10:15 ah kan nu he lennak i kan hung lawi lio, thlapa vang tangah zeinihdek ka kengah lungtum in lamnai tein a ka cheh. Kan hnulei kan zoh cu minung pakhat hmanh hmuhawk an um lo. Kan icaih len ko cu innpa Dolly nu nih thei kaw, a hung chuak i a kan hal. “Kanmah inn cungah thetse vui thum a vorh cang; atu naite ah khan, ka chuak i zeihmanh ka hmu lo, zeidang a si lo; mithla a si ko,” ti kaw, kan lu arbawm a tia. A thaizan cu caan bakte ah cun u No Kio a hung thih i a ruak tuanglai ah thisen vei zat he ka hmuh tikah lung in cheh ka simi kha ka vun sarsuan i, “Nang zong hi ti hin ruahlo in na thi tuan ve lai; khoiahdah na kal lai?” ti khi ka lungah a chuak i ka lau ngai; a ruak ka zohbu cun a ka thirh ko e. Cu thok cun ka vun ibiatak. Cu lioah Pu Van Hnuai Sum nih crusade a hung tuah i zan ruk le chun nga ka ngaih hnuah misual ka si le khamhciami ka si kai fiang. Praise the Lord!

SLP: Nai te kha "Thennak Vawlei" muvi nan chuahmi kan rak zoh i a tha ngai. Baibal cawng lio lawng te nih mahtluk nan chuah khawh kha kan rak i lawm tuk. Muvi nan chuahning le nai tinhmi na kan chim kho hnga maw?

C.VT: "Thennak Vawlei" muvi hi PCCF nih fund kawlnak ah tuanvo an ka pek caah kan chuahmi a si. Kai tinh bikmi cu:

1.	Kan Lai Seino hna nih zu le drugs an tih, an hrial naklai;
2.	Laimi nih kan itinhmi sang bik cu ramdang kal nakin fimthiamnak cawn i Pathian duhning in Lairam thanchoter a si naklai;
3.	Laiholh le Laibia a karhcho naklai; le
4.	Thingram dawt le zuah-hramh kan thiam ve cang naklai.

SLP: Nai tinhmi sullam cu a tha tuk, azohtu vialte nih cu sullam te he zoh thiam dih usih law a tha tuk hnga. Muvi nan chuahnak ah a harnak le a nuamhnak?

C.VT: Na bia vun in tan colh ko laang. Muvi kan ithlak kongah nuamhnak nakin harnak a let in a tam deuh. Kan tangka zin a tlawm tuk. Nang cu Hoilopar ah khan US $ 5000 ka hman na ti kha mu. Kan nih cu 500 lawng bak si kaw, quality ai dan tuk zongah kan mawh lo, ti awk a si ko hnga. Cun a thlak kan dih hlan cu zapi umkalti a si i umhar a pheng sawk. A thlak kan dih cun mah lawng deuh ngawt in um le kal, tuak le tan a si i, a nuam ti awk a um lo. "Marpa ka biar kai phoih vevek," ti lo ahcun tlolh sual a fawite.

SLP: Muvi chung mitthli kha tuahchom maw a tam deuh atak dah?

C.VT: Tuahchom zong cu a um pah nain, misual lei fitlaw thihnak khaan i a pu le sibawi pa mitthli kha cu a tak hmanhah a sit bak an si. Mei a kan ceuhtu nungak pawl zong an rak tapdih ve. Cun thlan i Tin Tin a tah ah khan a mitthli tam ngai a chuak nain zan a si caah kan langhter kho lo.

SLP: Phunhnih in na cang i na cannak zawn ah na thiam veve. Na no lio muisam te na keng ko rih khah. Fitlaw zongah cang law nai tlak ko rih hnga. Editing teh nangmah nih maw na tuah?

C.VT: Na hun ka fak i kai lawm. Edit tuah nemmam cu! Manila Laimi dang nih editing tuah kan thiam lo. Dr. Dennis fapa, Australia um pa Hre lawng nih a thiam. Kum cheu danah Manila vui hnih a hung tlawng i, cu chungah cun ni khat fai veve a kan editpiak. Pa Hre nih kan bawm hlah selaw hi muvi hi a chuak kho hnga lo. A cungah ka lunglawmhnak hi interview bia hin hun langhter ka duh. Duhning tein le caan tampi pekin edit thiam u silaw atu nak hin a ttha deuh men ko hnga. A tuanbia (zatlaan) kai uan tlukin a muvi ah ka langhter kholo tiin kai ruah.

SLP: Misual Ta Cung le Fidi Tin Tin kha ziahdah vuikhat tal nan hnamhter hna lo? "Cite alh lo pehang din" a lo kan ti kha.

C.VT: Hnamhter rilmal. An i hnamhning hmanh ai dawh tuk lo maw? (Annih cu an hmur zong an ingan lo pei tiah..ha..ha..ha..) Manila US thlanmual ramhring cung, pangpar a tilmi lakah dirbuin hmaitonh tein kan pomter hna i, pangpar kung a nge ai dawh ngaingaimi awngkua kaltlang (through) in shooting Rev. Joel Nawl Cung Lian nih a tuah hna nain pei computer storage kan tuahnak ah ai rawk sual cu, a poi kan ti tuk ve. A master reel Rengkun a phan cang fawn le zei ti awk a tha ti lo. Cucu comment tuahnak i na hun hlammi kha a si rua lo mei?

SLP: DC tlangval pakhat nih cun hnamh itel sehlaw hnamhnak khan lawng hmanh cu $ 5 man asi hnga, a ti cu ta. Kei cu hi hnu ka muvi ah cun hnamh hmanh ah a taktak kan telh cang lai. Khah! Ka bia a sau sual. "Thennak Vawlei muvi ka hmuhning" ka tialmi ah khan na lungsilonak zei a um el maw?

C.VT: "Hoilo Par" ah experience na ngeih cang caah comment tuahning na thiam tuk. Keinih a tuanbia tialning law nangmah nih Director hung tuan law ka duhning na khen bak hnga.

Comment number palinak belte kha kan ruahning ai dang. Tha Tha bia bantuk khan nungak nih thit-umh hlan ah an pum an tlangval an pek dih awk a si lonak langhter ka duh bia a si.

SLP: Comment palinak kha cu, tlangval nih nungak kha van sawm in van hnek deuh sehlaw a lehnak he ai tlak deuh hnga ti bia asi. Biadang deuh ah, Kan ram na kir tikah zeidah tuah nai timh?

C.VT: Ka ti khawh tawkin Pathian rian ka tuan ko lai. Caleh zong ai tel men rih lai cu. ( Kan nu belte nih, caleh cu na re a thei tuk, tiah a ka senh tuk ti lo).

SLP: Kan Laiholh le kan Laica karhchonak caah kan pa le hna nih ca tampi nan kan tialpiak a hau ko, nan nu nih cun in thlauh sawh hlah seh. Biaralkah piin; atu lio Laimi hlasak thiam hna kongah na hmuhning?

C.VT: Atu lio kan Lai seino hna hlasak le a ringawn tum an thiam ngaingai cang i, an cungah kai lawm ti chim ka duh. A bik in Sung Tin Par nih Kawl hla in Kawlram dihlak minthang bik dirhmun ah a kan dirpiak. Hniang Hniang zong Lai hla ah minthang bik pakhat asi ve. A ringawn tum lei zongah miphundang sinah zahpi awk kan si ti lo. Pu Ro Thawng te nupa hna nih on stage performance show album hna an kan tuah-chuahpiak. Laimi a chan hoih in kan tthangcho ngai ve cang. Hi nakin kan san chin lengmang khawh nakhnga kan Lai seino hna chungah Salai Tawna bantukin ram dang, a nai bikah Manila ti bantuk ah music sianginn a kaimi tam deuh hna selaw ti ka duh. Cawn lo thiam cu a chan a tawi; cawn i thiam cu a chan a sau.

SLP: "Cawn i thiam cu a chan a sau" na timi cu cinken awk tlak ngai asi. Lai hla kongah saduh na thahmi?

C.VT: Ka saduhthah a tling kho deuh rih lomi cu Kan Lairam khuapi Hakha khua ah Aizawl tluk tal recording studio le seh thilri kan ngeih khawh rih lomi hi a si. Ngei kho u si law, atu lioah album pakhat ca i an dihmi tangka nih khin album pahnih a chuah khawh hnga. Hlasak thiam zong an karh deuh ngai hnga. Cu tikah vawleipum nih Laimi a kan theih tuan deuh hnga. Vawleipum nih Philippines ram a theih ngainak chan cu hla le musik ruangah a si ve, ti a si. Mirang hla hi Filipin pawl sakmi maw Mirang taktak sakmi dah ti theih awk tha loin an chuahmi album a tam tuk cang.

SLP: Radio hla na rak sakmi lakah na uar khun mi a um maw?

C.VT: Uar bik ti cun ka ngei lem lo. Ka radio hla lakah khan "Thennak Vawlei" timi hla kha request a tam cem. Remembrance hei ti phunin atu kan Muvi zongah a min ka laak hi. Cun "Lamot Bang Dawtnak" ti hla zong kha ai co kho lo mi hna nihcun an uar ngai ti ka theih. Ai uar lio le ai helh lio nungak tlangval nih cun "A Thar Than Maw Lunglen," ti kha an duh bik an ti.

SLP: Lai zuun hla na phuahmi a tam maw? A bia nai lungsitnak te hun sa hnik. Na aw hna a tha ti hnga maw?

C.VT: Ka radio hla fung 75 chungah hin thum chuah khat cu keimah lyrics an si. Asinain keimah le keimah zong kai lungtlinh ruam ve lomi cu own tune tam ka ngeih lomi; Mirang hla aw umcia deuh ngawt sak ka rak hman mi hi a si. Chan khat nawn rau cang kaw practice ti lo fam nih ka aw tu cu Chur chinawnrek thlau in ka thlau ai cang. Ka hla chungah a lyrics (hlabia) kai lungsit deuhmi cu "A Thar Than Maw Lunglen" kha a si. Cun hla dang a bia kai lungsit bikmi, caang khatte ka vun in sakpiak kun lai aw. Ni hlah luau.

" Kan karlak thlizil hran hmanhah kan ihlat ai rua ka ti lio i nang he tthen cu, fak chin meihma chem sual bang thinlung nih kuai hnik ai zal, zeitin ti awk tha tung lo."

SLP: Ah, na aw zong a taang pah rih ko hih. ( Kan pahnih kan ni veve) Album pakhat in chuah izuam ve rih lehlam. Bia donghnak ah, laimp4 kongah ruahnak cheuh na duhmi?

C.VT: Laimp4 nan kan tuahpiakmi cu Laimi kan caah rothil tha taktak asi. Atu hmanh ah tamlak pei nan rak khumh cang hi. Lai hla, Lai muvi, biaruahnak (interview), tling tein khumh i zuam u. Nai hna kha Lai Baibal ka ngei lo, a bia ka herhnak zawn te kha laimp4 i nan kan chiahpiakmi ah ka hun char khawh le kai lawmhning chim awk a tha lo. Hla le muvi lawng si loin thil dang a herhmi pei tamtuk nan rak kan chiahpiak hi. Comment zong ka hun tuah ve cang kha mu. A herhnak poah ah kan in bomh cio hna lai. Chan nguh rothil nan kan serpiak caah kan lomh tuk hna.

SLP: Caan na kan pek caah Laimp4 min in na cungah tampi kan i lawm.

C.VT: Laimp4 le nangmah cungah kai lawm tuk ve. Pathian thluachuah nan cungah hmun ko seh. Amen.